काठमाडौं– शंकर कोइरालाको डेब्यु निर्देशन रहेको फिल्म  ‘मोदीबेनी’ आगामी साउन १८ गते प्रदर्शनमा आउने भएको छ । निर्माण पक्षले मंगलबार फिल्मको प्रदर्शन मिति टुंगो लगाएको हो । 

यस फिल्मबाट अभिनेत्री रेजिना उप्रेती करिब १२ वर्षपछि अभिनयमा फर्किएकी छन् । यही फिल्मबाट नायक अमर प्रताप श्रेष्ठले ठूलो पर्दाको मुख्य भूमिकामा डेब्यु गर्दै छन् । उनीसँगै नायिका वर्षा सिवाकोटी मुख्य भूमिकामा रहेको बताइएको छ । 

फिल्ममा अमर, वर्षा र रेजिनासहित प्रवीण खतिवडा, सरोज खनाल, दिलीप केसी, कमलमणि नेपाल, जीवन भट्टराईलगायतको अभिनय रहने बताइएको छ । 

निर्देशक कोइरालाका अनुसार फिल्म पर्वत जिल्लाको मोदीबेनी क्षेत्रमा घटेको अविश्वसनीय घटनामा आधारित छ । 

डिनेस्ट इन्टरटेनमेन्टको प्रस्तुतिमा बनेको यो चलचित्रलाई आनन्द बिक्रम क्षेत्रीले लेखेका छन् । दिलीप के.सी. निर्माता र हरि श्रेष्ठ सह-निर्माता रहेका छन् ।