काठमाडौं- नेपाली कांग्रेसका प्रमुख सचेतक रमेश लेखकले आगामी राष्ट्रपति रामचन्द्र पौडेलले दुवै सदनको बैठमा प्रस्तुत गर्ने नीति तथा कार्यक्रम सुन्ने बताएका छन् ।

लेखकले सहकारी ठगी प्रकरणमा मुछिएका उपप्रधान तथा गृहमन्त्री रवि लामिछानेबारे छानबिन गर्न संसदीय समिति गठनको मागमा यथावत रहेको बताउँदै राष्ट्रपतिको सम्मानका लागि मंगलबारको संसद् बैठकमा भाग लिने बताए ।

‘कांग्रेसले आफ्नै नेतृत्वमा नेपालको संविधान बनाएको हो । आफ्नै नेतृत्वमा संघीय लोकतान्त्रिक गणतन्त्रात्मक व्यवस्था पद्धतिलाई स्थापना गरेको हो’, उनले भने, ‘यसमा राष्ट्र प्रमुखमा रुपमा रहनु भएका राष्ट्रपतिको विशेष संवैधानिक महत्व, गरिमा र मर्यादा छ द। हामी संविधानका व्यवस्थालाई हेरेर संघीय संसदको संयुक्त बैठकमा भाग लिन्छौँ। हामी राष्ट्रपतिज्यूको सम्बोधन सुन्छौँ।’

लेखकले राष्ट्रपतिबाट संसद्‍का दुवै सदनको संयुक्त बैठकलाई सम्बोधन गरिसकेपछि अरु कार्यसूचीमा भने अघि बढ्न नदिने बताए ।

‘त्यसपछि कुनै पनि सरकारी काम कारबाही, सरकारले ल्याएका कार्यसूचीमा प्रवेश गर्न दिँदैनौँ । संसदीय छानबिन समिति गठन नगर्दासम्म संसद्‍ अघि बढ्न सक्दैन’, उनले भने, ‘यसबाट उत्पन्न हुने परिणामको सरकारले जवाफ दिनुपर्छ। त्यसको जवाफदेहिता सरकारले लिनु पर्दछ।’