काठमाडौं– भारतको सबैभन्दा ठूलो व्यापारिक घराना टाटा समूहले सेमिकण्डक्टर चिप उत्पादन गर्ने भएको छ । टाटा समूहले गुजरात र आसाम राज्यमा चिप कारखाना स्थापना गर्ने भएको हो । गुजरातमा टाटा समूहले ११ अर्ब डलरको लगानीमा कारखाना खोल्न लागेको हो ।

गुजरातमा टाटाले ताइवानकोे पावरचिप सेमिकण्डक्टर कम्पनीसँग मिलेर कारखाना स्थापना गर्न लागेको इकोनोमिस्टले जनाएको छ । गुजरातमा स्थापित कारखानाबाट २० हजार जनाले रोजगारी पाउने अपेक्षा गरिएको छ ।

त्यसैगरी आसाममा टाटाले ३ अर्ब डलरको लगानीमा कारखाना खोल्न लागेको हो । यहाँ टाटा एक्लैले कारखाना स्थापना गर्न लागेको इकोनोमिस्टले उल्लेख गरेको छ । आसाममा स्थापित कारखानाबाट २७ हजार जनाले रोजगारी पाउने अपेक्षा गरिएको छ । मुलुकलाई हाइटेक प्रविधिमा सबल बनाउने भारत सरकारको लक्ष्यअनुसार ती कारखाना स्थापना गरिएको जनाइएको छ ।

टाटाका अध्यक्ष नटराजन चन्द्रशेकरनले टाटाले प्रविधिको क्षेत्रमा लगानीलाई अझै बढाउँदै लैजाने बताए ।