काठमाडौं– नेकपा एमालेले केन्द्रको सत्तासमिकरण अनुसार नै सुदूरपश्चिममा सरकार बन्ने विश्वास व्यक्त गरेको छ ।

पार्टी कार्यालय च्यासलमा आइतबार बसेको एमाले सचिवालय बैठकपछि एमाले उपमहासचिव प्रदीप ज्ञवालीले नागरिक उन्मुक्ति पार्टीभित्रको समस्याले सुदूरपश्चिममा सरकार बन्ने विषयका केही जिज्ञासा खडा भए पनि केन्द्रको गठबन्धन अनुसार नै सरकार बन्ने विश्वास व्यक्त गरे ।

उनले कोशी प्रदेशमा वर्तमान मुख्यमन्त्रीले बहुमत गुमाएकाले नयाँ सरकार गठनका लागि मार्ग प्रशस्त गर्नुपर्ने धारणा राखे । संसदबाट सरकार बन्ने अवस्थासम्म संसद् विघटन नहुने सर्वोच्चको फैसलाको नजिर अनुसार मुख्यमन्त्रीले मार्ग प्रशस्त गर्नुपर्ने उनको भनाइ छ ।

ज्ञवालीले सरकारबाट अप्रत्याशित हट्नुपर्दाको प्रतिशोध स्वरूप कांग्रेसले गृहमन्त्रीमाथि छानबिन गर्न संसदीय छानबिन समितिको माग गरेको तर्क गर्नुभयो । सचिवालय बैठकले वैशाख ८ र ९ गते हुने महाधिवेशन प्रतिनिधि परिषद्को पहिलो बैठकको एजेन्डा तय गरेको छ । २१ सय ५३ महाधिवेशन प्रतिनिधि र विभिन्न आयोगका पदाधिकारी सहित २५ सय सहभागी हुने बैठकमा पार्टी अध्यक्षले राजनीतिक प्रतिवेदन र महासचिवले साङ्गठनिक प्रतिवेदन पेश गर्ने ज्ञवालीले जानकारी दिए ।

महाधिवेशन प्रतिनिधि परिषद्को बैठकबाट आगामी चुनावमा पार्टीलाई बहुमत ल्याउने गरी तयारी गर्न आवश्यक निर्णय हुने एमालेले जनाएको छ । बैठकले नयाँ समीकरण र सरकारको कामकारबाहीका बारेमा छलफल भएको र सरकारको कामलाई थप प्रभावकारी बनाउनुपर्ने निष्कर्ष निकालेको ज्ञवालीले बताए ।