ढाका- बंगलादेशकी प्रधानमन्त्री शेख हसिनाले भारतसँगको सम्बन्ध थप सुमधुर बनेको बताएकी छिन् । हालै सम्पन्न निर्वाचनमा विजयी भएसँगै प्रधानमन्त्री हसिनाले भारतसँग आर्थिक क्षेत्रमा थप सहकार्य गर्न चाहेको उल्लेख गरिन् ।

प्रधानमन्त्री हसिनाले इतिहासमा विभिन्न अवसरमा भारतले बंगलादेशको सहयोग गरेको भन्दै भारतको प्रसंशासमेत गरिन् ।

प्रधानमन्त्री निवास गणभवनमा भारतीय समाचार संस्था एएनआईसँगको कुराकानीमा हसिनाले भनिन्, ‘भारत बंगलादेशको ठूलो मित्र हो । भारतले हामीलाई सन् १९७१ र १९७५ मा सहयोग गरेको हो । भारतलाई हामी सँगैको छिमेकी पनि मान्दछौँ ।’

उनले आफ्नो आगामी ५ वर्षे कार्यकालमा द्विपक्षीय सम्बन्ध थप सुमधुर बन्ने पनि उल्लेख गरिन् । आगामी कार्यकालमा भारतसँगको आर्थिक सहकार्यलाई आफूले विशेष ध्यान दिनेसमेत बताइन् ।