काठमाडौं – रुसी राष्ट्रपति भ्लादिमिर पुटिनले भारतलाई वास्तविक साझेदारको संज्ञा दिएका छन् ।

रुसको सोचीमा आयोजित एक कार्यक्रमलाई सम्बोधन गर्दै राष्ट्रपति पुटिनले दशकौँदेखि भारत आफ्नो मुलुकको वास्तविक साझेदारका रुपमा रहेको टिप्पणी गरे ।

उनले भारतलाई बेलायती उपनिवेशबाट स्वतन्त्र बनाउन तत्कालीन सोभियत संघले पनि महत्वपूर्ण भूमिका खेलेको भन्दै हाल आएर दुई मुलुकबीच सबै क्षेत्रमा सहकार्य अभिवृद्धि भइरहेको बताए ।

रुसी समाचार संस्था तासका अनुसार राष्ट्रपति पुटिनले दुई मुलुकबीचको सम्बन्ध वर्तमानको यथार्थमा आधारित रहेको टिप्पणीसमेत गरे ।

उनले दुई मुलुकबीचको व्यापार ६० अर्ब डलर पुगेको उल्लेख गरे । डेढ अर्ब जनसङ्ख्या रहेको मुलुक भारत विश्वका शक्तिशाली मुलुकको सूचीमा आउने उनको भनाइ छ ।