एजेन्सी– भारतमा भएको विधानसभा उपनिर्वाचनमा कांग्रेस नेतृत्वको इन्डिया गठबन्धनले शानदार जीत हासिल गरेको छ ।
विभिन्न सात राज्यमा रिक्त भएको सीटमा गत बुधबार उपचुनाव भएको थियो । उपचुनावको मत परिणाम आज सार्वजनिक भएको हो ।
केन्द्रमा प्रतिपक्षी रहेको इन्डिया गठबन्धनले १३ मध्ये १० सिट जितेको छ । सरकार हाँकिरहेको भाजपा नेतृत्वको एनडीए गठबन्धन भने जम्मा दुई सीटमा खुम्चिएको छ । एक सीटमा स्वतन्त्र उम्मेदवार विजयी भएका छन् ।
इन्डिया गठबन्धनको प्रमुख घटक कांग्रेसले चार, तृणमूल कांग्रेसले चार, डीएमके र आम आदमीले एक/एक सीटमा जीत हासिल गरेका हुन् ।
हिमाञ्चल प्रदेशको देहरा सीटमा राज्यका मुख्यमन्त्री सुखविंदर सिंह सुक्खूकी पत्नी एवम् कांग्रेस उम्मेदवार कमलेश ठाकुरले बीजेपीका होशियार सिंहलाई ३२ हजारभन्दा बढी मतान्तरले पराजित गरेकी छिन् ।
तर मुख्यमन्त्री सुक्खूलाई भने उनकै गृह जिल्लाको हमीरपुरमा भाजपा उम्मेदवार आशिष कुमार शर्माले करिब १५ सय मतान्तरले पराजित गरिदिएका छन् ।
हिमाञ्चलको नालागढ विधानसभा सीटमा कांग्रेसका हरदीप सिंह बावाले जीत हासिल गरेका छन् ।
पश्चिम बङ्गालका चारै सीटमा तृणमूल कांग्रेसका उम्मेदवार विजयी भएका छन् । तमिलनाडुको विक्रावन्डी सीटमा डीएमकेका अन्नियूर शिवा एक लाख २४ हजार मतले विजयी भएका छन् ।
बिहारको रूपौली सिट निर्दलीय उम्मेदवार शंकर सिंहले जितेका छन् । भाजपा शासित मध्य प्रदेशको अमरवाडा सिटमा भाजपाका प्रत्यासी कमलेश प्रताप शाह निर्वाचित भएका छन् ।
प्रतिक्रिया