काठमाडौं– बङ्गलादेशका गृह मामिला सल्लाहकार ब्रिगेडियर जनरल (सेवा निवृत्त) एम सखावत हुसेनले अल्पसङ्ख्यकहरूको सुरक्षा दिन नसकेको भन्दै माफी मागेका छन् । 

प्रधानमन्त्री सेख हसिनाले पदबाट राजीनामा दिएर देशबाट भागेपछि बङ्गलादेशका अल्पसङ्ख्यक हिन्दु धर्मावलम्बीमाथि मुस्लिम धर्मावलम्बीहरूले जादति गरेको समाचार आइरहेका बेला उनले माफी मागेका हुन् ।

‘अल्पसंख्यकहरुलाई सुरक्षा दिनु बहुसंख्यकहरुको जिम्मेवारी हो । तर, उनीहरु बहुसङ्ख्यकले अल्पसङ्ख्यकहरूलाई सुरक्षा दिन सकेनन् ।

तपाईंहरू मस्जिद गएर ५ पल्ट नमाज पढ्न सक्नुहुन्छ,’ हुसेनले भने, ‘तर अल्पसङ्ख्यकहरूलाई सुरक्षा दिन सक्नुभएन । अल्पङ्ख्यकलाई सुरक्षा दिनु तपाईंको जिम्मेवारी हो । तपाईंहरू असफल हुनुभयो । यसको जवाफ दिनुपर्छ ।’

उनले अल्पसङ्ख्यकसँग माफी पनि मागेका छन् । ‘म मेरा अल्पसङ्ख्यक भाइहरूसँग माफी माग्न चाहन्छु, मलाई माफी दिनुस् । अहिले पनि हाम्रो अवस्था अस्थिर छ । हामी हरेक क्षेत्रमा तपाईंहरूलाई सुरक्षा दिन सकिरहेका छैनौँ । केही स्थानहरूमा सिविल सोसाइटीका मानिसहरूले अल्पसङ्ख्यकलाई सुरक्षा दिएका छन् । पुलिस र रेपिड एक्शन फोर्सको अवस्था अहिले पनि राम्रो छैन । तर, अवस्था सुधार्छौँ ।’

हुसेनले जन्माष्टमी पूजाका लागि सम्पूर्ण सुरक्षाको प्रबन्ध गरिने आश्वासन पनि दिए । उनले दुर्गा पूजाको बिदा तीन दिनसम्म बढाउन पनि सुझाव दिए ।
‘जति सुरक्षा चाहिन्छ, उपलब्ध गराउँछौँ । यसका लागि जिल्ला प्रशासक जिम्मेवारी लिन्छन् । हाम्रो काम भनेको सबैको रक्षा गर्ने हो,’ हुसेनले भने, ‘चाहे कोही हिन्दु होस कि मुस्लिम वा इसाई होस् । म विश्वस्त छु मेरो कुराबाट तपाईंहरू आश्वस्त हुनुहुनेछ ।’