काठमाडौं- सत्तारुढ दल नेपाली कांग्रेसका सभापति शेरबहादुर देउवाले भ्रातृ संगठनहरूको महाधिवेशन गराउनका लागि निर्देशन समिति बनाएका छन् ।

कांग्रेसका भ्रातृ संस्थाहरू नेपाल विद्यार्थी संघ, नेपाल तरूण दल, नेपाल महिला संघ, नेपाल किसान महासंघ, नेपाल दलित संघ, नेपाल लोकतान्त्रिक खेलकुद संघ, नेपाल प्रजातन्त्र सेनानी संघ, नेपाल भूतपूर्व सैनिक संघ, राष्ट्रिय लोकतान्त्रिक अपाङ्ग संघ र नेपाल थारू संघको महाधिवेशन २०८१ चैत्र मसान्सम्म अनिवार्य गर्न विद्यमान तदर्थ समितिलाई समन्वय र सहयोगका लागि महाधिवेशन केन्द्रीय निर्देशन समिति बनाइएको हो ।

देउवाले नेपाल दलित संघ महाधिवेशन केन्द्रीय निर्देशन समितिको संयोजक पार्टी सह-महामन्त्री जीवन परियारलाई तोकेका छन् । समिति सदस्यहरूमा केन्द्रीय सदस्यद्वय लक्ष्मी परियार र शान्ति परियार विक छन् ।

महिला संघ महाधिवेशन केन्द्रीय निर्देशन समितिको संयोजकमा प्रवक्ता डा. प्रकाशशरण महत छन् । केन्द्रीय सदस्यद्वय पुष्पा भुसाल र रुक्मिणी कोइराला उक्त सदस्य छन् ।

किसान महासंघ महाधिवेशन केन्द्रीय निर्देशन समितिको संयोजकमा रमेश रिजाल, सदस्यहरूमा केन्द्रीय सदस्यद्वय राजेन्द्रकुमार केसी र अञ्जनी श्रेष्ठ छन् ।

नेपाल भूतपूर्व सैनिक संघ महाधिवेशन केन्द्रीय निर्देशन समितिको संयोजकमा केन्द्रीय सदस्य एनपी साउद संयोजक तोकिएका छन् । सदस्यहरूमा केन्द्रीय सदस्यद्वय टेकप्रसाद गुरुङ, महेन्द्रकुमारी लिम्बू छन् ।

नेपाल लोकतान्त्रिक खेलकुद संघ महाधिवेशन केन्द्रीय निर्देशन समितिको संयोजकमा मोहनबहादुर बस्नेत, सदस्यमा उमेशजंग रायमाझी र गणेश लामा सदस्य छन् ।

राष्ट्रिय लोकतान्त्रिक अपाङ्ग संघ महाधिवेशन केन्द्रीय निर्देशन समितिको संयोजकमा मधु आचार्य, सदस्यमा सरस्वती बजिमयँ र मदनकृष्ण श्रेष्ठ, नेपाल थारू संघ महाधिवेशन केन्द्रीय निर्देशन समितिको संयोजकमा उदयशमशेर राणा, सदस्यमा डा. गोपाल दहित र योगेन्द्र चौधरी छन् ।

त्यस्तै, नेपाल प्रजातन्त्र सेनानी संघ महाधिवेशन केन्द्रीय निर्देशन समितिको संयोजकमा प्रा.डा. गोविन्दराज पोखरेल, सदस्यहरूमा मुक्ताकुमारी यादव र कान्तिका सैजुवाल छन् ।