काठमाडौं – वेस्ट इन्डिजले बंगलादेशसँगको एकदिवसिय शृङ्खला जितेको छ। मंगलबार भएको दोस्रो खेलमा घरेलु टोली वेस्ट इन्डिजले बङ्गलादेशलाई ७ विकेटले हराएको हो।

२२८ रनको लक्ष्य पाएको वेस्ट इन्डिजले ३६.५ ओभरमा तीन विकेटको क्षतिमा २३० रन जोडेको हो। वेस्ट इन्डिजका लागि ब्रान्डन किङले ८२ रन जोडे। ७६ बलको सामना गरेका उनले ८ चौका र ३ छक्का प्रहार गरे। एभिन लेविसले ४९ तथा केइसी कार्टीले ४५ रन जोडे। साइ होप १७ तथा स्टेफन रुदरफोर्ड २४ रनमा अविजित रहे।

यसअघि टस हारेर पहिले ब्याटिङ गरेको बङ्गलादेशले ४५.५ ओभरमा २२७ रन जोड्दै सबै विकेट गुमाएको हो।

बङ्गलादेशका मुदुल्लाहले ६२ रन जोडे भने तान्जिद हसनले छिटो रन बनाउने क्रममा ३३ बलमा ४६ रन जोडे। नवौँ क्रममा ब्याटिङ गरेको तान्जिन हसन सकिबले ४५ रन जोडे।

बङ्गलादेशलाई सस्तोमा समेट्ने क्रममा जाइडन सिल्सले ९ ओभरमा २२ रन खर्चेर ४ विकेट लिए। उनी म्यान अफ द म्याच बने।