काठमाडौं- प्रतिपक्षी राष्ट्रिय स्वतन्त्र पार्टी (रास्वपा)को सचिवालय बैठक बसिरहेको छ ।
प्रतिनिधिसभाकी उपसभामुख इन्दिरा राना मगरलाई पदबाट हटाउने तयारीमा सत्ता गठबन्धन नेपाली कांग्रेस र नेकपा एमाले जुटेपछि यसबारे धारणा बनाउन रास्वपाल सचिवालय बैठक बसेको हो ।
सत्तारुढ दलहरूले उपसभामुख रानामगरलाई हटाउने तयारी गरिसकेका छन् । यसबारेमा पार्टीको आधिकारिक धारणाका लागि सचिवालय बैठक बसेको प्रवक्ता मनिष झाले जानकारी दिएका छन् ।
सम्भवत: बिहीबार उपसभामुख रानामगरलाई हटाउने दुईतिहाइ सांसदको हस्ताक्षरसहितको प्रस्ताव संसद्मा दर्ता हुने छ । बिहीबार रानागमगरलाई बिदा गर्ने योजनामा सत्तारुढ दल जुटेका छन् ।
सत्तारुढ दलहरूले संवैधानिक परिषद्मा बहुमत बनाउन यो तयारी गरेका हुन् । इन्दिरा रानामगर रास्वपाकी समानुपातिक सांसद हुन्। उनले अमेरिकी दूतावासमा भिसाका लागि पत्र लेखेर देशकै बेइज्जत गरेको तर्क दुई ठूला दलको छ ।
संवैधानिक परिषद्को अध्यक्ष प्रधानमन्त्री रहने व्यवस्था छ । सदस्यहरूमा प्रतिनिधि सभाको सभामुख, राष्ट्रिय सभाको अध्यक्ष, प्रतिनिधि सभामा विपक्षी दलको नेता, प्रतिनिधि सभाका उपसभामुख र प्रधानन्यायाधीश संवैधानिक रहने व्यवस्था छ ।
प्रतिक्रिया