काठमाडौं– जनता समाजवादी पार्टी (जसपा)का अध्यक्ष अशोक राईले आफू मन्त्री हुने लाइनमा नभएको स्पष्ट पारेका छन् ।

उनले शनिबार खबरहबसँग कुरा गर्दै आफू र आफ्नी पत्नी सुशीला श्रेष्ठ मन्त्री हुने कुनै तयारीमा नरहेको बताए ।

उनले भने, ‘अहिले हामी पार्टी बनाएर जान्छौँ । यदि सरकारमा हामीले कसैलाई पठाउनुपर्ने भाग आयो भने साथीहरूलाई पठाउने हो । हामी लामो राजनीतिक यात्रामा होमिएका छौँ । साथीहरूलाई मिलाएर लान्छौँ ।’

पछिल्लो समय जसपा नेपालका अध्यक्ष उपेन्द्र यादवलाई सरकारबाट निकालेर राई निकट सांसदलाई मन्त्री बनाउने चर्चा सुरु भएको छ  । तर यसमा प्रधानमन्त्रीले कुनै विकल्प दिएका छैनन् ।

यादवले भने आफूलाई सरकारमा काम गर्न ‘कम्फरटटेबल’ नभएको महसुस गरिरहेका छन् ।

नयाँ जसपाका अध्यक्ष राई केही दिन अघि उपप्रधानमन्त्रीसहित मन्त्री दिए आफू नै सरकारमा जान तयार रहेको चर्चा थियो । तर पछिल्लो समय उनी पछि हटेका छन् । मन्त्री बन्नुभन्दा पनि पार्टी संगठन विस्तारमा लाग्ने उनको तर्क छ ।