काठमाडौं– स्वास्थ्य तथा जनसङ्ख्या मन्त्रालयले केही कर्मचारीको जिम्मेवारी हेरफेर गरेको छ ।

गत शुक्रबार मन्त्रीस्तरीय निर्णयबाट उनीहरूको जिम्मेवारी हेरफेर गरिएको हो । आयुर्वेद तथा वैकल्पिक चिकित्सा विभाग र सिंहदरबार वैद्यखानाको नेतृत्व सम्हालिरहेका डा. प्रदिप केसीलाई वैद्यखानामै केन्द्रित गर्ने निर्णय गरिएको छ। विभागको नेतृत्व अहिलेलाई खाली राखिएको छ ।

त्यस्तै स्वास्थ्य सेवा विभागको उपचारात्मक सेवा महाशाखाका निर्देशकबाट केही समयअघि मात्रै टेकु अस्पताल पठाइएका डा. अनुप बास्तोला मन्त्रालय ल्याइएका छन् । उनलाई मन्त्रालयमै विशेष जिम्मेवारी दिने गरी सरुवा गरिएको बताइएको छ ।

गेटा अस्पतालको नेतृत्वको जिम्मेवारी पनि हेरफेर भएको छ । त्यहाँ कार्यरत डा. विप्लव सापकोटाको स्थानमा सेती प्रादेशिक अस्पतालमा कार्यरत डा.अशोक श्रीपाइलीलाई पठाइएको छ। डा. सापकोटालाई त्यही राखिएको छ ।

त्यसै गरी स्वास्थ्य सूचना तथा सञ्चार केन्द्रमा कार्यरत डा. भक्त केसी मन्त्रालयको समन्वय महाशाखामा सरुवा भएका छन् । डा. केसीको ठाउँमा उपेन्द्र ढुंगानालाई सरुवा गरिएको छ ।