काठमाडौं- सहकारी संस्था बचत रकम दुरुपयोग संसदीय छानबिन विशेष समितिले सहकारी पीडितसँग छलफल गरेको छ ।

सिंहदरबारमा बुधबार समितिले सहकारी क्षेत्रमा देखिएका समस्या र त्यसबाट भोग्नुपरेको समस्याबारे पीडितहरूसँग छलफल गरेको हो ।

त्यस क्रममा उनीहरूले बचत फिर्ताका लागि आन्दोलन गरे पनि सरकारले आफूहरूको समस्या नसुनेको गुनासो गरेका थिए ।

त्यस्तै उनीहरूले अधिकांश सहकारी ठगहरू स्वदेशमा रहे पनि सरकारले देश बाहिर रहेका सहकारीलाई मात्र खोज्ने प्रयास गरेको बताएका छन् ।

समिति संयोजक सूर्य थापाले सहकारी पीडितलाई न्याय दिन आवश्यक सुझाव दिन पीडितहरूसँग छलफल गरेको बताएका छन् ।

बचतको अपचलन गर्ने नियतका साथ आएका सहकारीले ठगी गरेकाले सबै सहकारीले ठगी गरेको नबुझ्न उनले पीडितहरूलाई आग्रह गरे ।

संयोजक थापाले तथ्यप्राप्त गर्न जेलमा रहेका सहकारी ठगी गर्नेलाई पनि सोधपुछ गर्ने बताएका छन् ।

सहकारी ठगी गरेर विदेशमा लुकेकालाई पनि नेपाल ल्याउन आवश्यक कानुनबारे जानकारी लिएको उनले बताए ।

गत जेठ १५ गते सहकारीको बचत रकम अपचलनसम्बन्धी छानबिन गर्न संसदीय छानबिन समिति गठन भएको थियो ।