रौतहट – रौतहटस्थित अज्ञात हतियारधारी समूहले एकजना सुन चाँदी ब्यवसायीमाथि साङ्घातिक हमला गरेको छ । प्रहरीले घटनास्थलबाट पेस्तोल र खुकुरी बरामद गरेको छ ।

गएराती अज्ञात समूहले गढिमाई नगरपालिका  १ समनपुरका कनहाई साहको छोरा सुनचाँदी व्यवसायी चन्दन साह सोनारको टाउको हातमा खुकुरी प्रहार गरि गम्भीर घाईते  बनाएका छन । घाईते सोनारलाई अहिले उपचारका लागि वीरगन्ज स्थित वयोधा अस्पताल पठाइएको थियो ।

घाईते व्यवसायीको हाल बयोधा अस्पतालमा उपचार भइरहेको र खतरा मुक्त रहेको प्रहरीले जनाएको छ। जिल्ला प्रहरी कार्यालय रौतहटका प्रमुख दीलिप घिमिरेका अनुसार गएराती करिब साढे ८ बजे गरुडा र धमौरा गाँउ बिचको बाटो अवरुद्व बनाई ३५ वर्षीय  सोनारमाथि अज्ञात समूहले खुकुरी प्रहार गरी घाईते बनाएको थियो ।

गरुडा ९ नरकटिया गाउँदेखि १ किलोमीटर दक्षिण बाटोमा  गरुडाबाट समनपुर तर्फ जाँदै गरेको ना ४८ प ४५५७ नम्बरको को मोटरसाइकल रोकेर अज्ञात समूहले व्यवसायीमाथि आक्रमण गरेको थियो ।

घटना लगत्तै इलाका प्रहरी कार्यालय गरुडाको प्रहरी टोलीले घाइतेलाई उपचारको लागी पठाएको थियो । घटनास्थालमा प्रहरीले खुकुरी १ थान  र कटुवा पेस्तोल थान -१ फेला पारेको थियो ।

घाइतेको ना ४८ प ४५५७ नम्बरको मोटरसाईकललाई खुकुरी प्रहार गर्ने ब्यक्तिले लिई भागेकामा घटनास्थल भन्दा १ किलोमीटर पूर्वतर्फ रोडको पिलरमा ठोकी सोही ठाउँमा लडेको अवस्थामा बरामद भएको थियो । घटना बारे थप अनुसन्धान भइरहेको तथा फरार अभियुक्तको खोजी भइरहेको जिल्ला प्रहरी कार्यालय रौतहटले जनाएको छ ।

न्युजकारखानाबाट