काठमाडौँ– बलिउड फिल्म निर्माता करण जोहर अविवाहित हुन्, तर उनी जुम्ल्याहा सन्तानका बुवा हुन् । सन् २०१७ मा उनी सेरोगेसी मार्फत छोरा यश र छोरी रुहीको बुवा बनेका हुन् ।

करण अविवाहित बुवा मात्रै होइनन्, उनी समलिङ्गी पुरुष पनि हुन् । यो कुरा उनले आफ्नो जीवनीमा आधारित किताबमा उल्लेख गरेका छन् ।

विभिन्न अन्तर्वार्तामा उनले सांकेतिक रुपमा विवाह नगर्नुको प्रमुख कारण यही भएको बताउँदै आएका छन् ।

करण आफ्नो ब्यानरमा बनेको फिल्म ‘ब्याड न्युज’को प्रदर्शनको सङ्घारमा छन् । यसको प्रचारका लागि दिएको एक अन्तर्वार्तामा उनले एकल बुवा भएर सन्तान हुर्काउन छुट्टै चुनौति व्यहोरेको खुलासा गरे ।

अहिले करणका छोराछोरीको उमेर सात वर्ष पुग्यो । करणकाअनुसार उनीहरूले हजुरआमालाई आमा ठान्दै आएका थिए । तर बुझ्ने भएसँगै उनीहरूले प्रश्न गर्छन् रे, ‘उहाँ त हाम्रो हजुरआमा हो, हामी कसको पेटबाट जन्मियौँ ?’

आफ्नो परिवार आधुनिक किसिमको भए पनि सन्तानको प्रश्नको सामना गर्न सहज नभएको उनी बताउँछन् । अभिभावकको रुपमा झनै कठिन हुने उनी अनुभव सुनाउँछन् । सन्तानलाई उनीहरूको जवाफ विज्ञको सल्लाहअनुसार दिन परामर्शको तयारी रहेको उनी बताउँछन् ।