काठमाडौं : नेपाल-बंगलादेश सचिवस्तरीय ऊर्जा बैठक आगामी असार ८ र ९ गते हुने भएको छ । दुई दिनसम्म पोखरामा हुने बैठकमा विद्युत् व्यापार र निर्यात गर्ने केही बुँदाहरुमा सहमति र छलफल हुनेछ ।

ऊर्जा तथा जलस्रोत मन्त्रालय स्रोतका अनुसार बैठकमा विभिन्न तीन चरणमा सम्झौता र छलफल गर्ने तयारी छ । पहिलो चरणमा सुनकोशी–३ जलविद्युत् आयोजनाको निर्माणका लागि आवश्यक पर्ने लगानी र निर्माणको मोडालिटीबारे सम्झौता हुनेछ ।

६८३ मेगावाट क्षमताको सुनकोशी–३ जलविद्युत् आयोजना विकास गर्न बंगलादेश पावर डेभलपमेन्ट बोर्डसँग सम्झौता गर्ने तयारी गरिएको मन्त्रालयका सहसचिव तथा प्रवक्ता नविनराज सिंहले बताए । विगतमा पनि बंगलादेशले सुनकोशी–३ जलविद्युत् आयोजनामा लगानी गर्न इच्छा देखाएकाले आगामी बैठकले लगानीको बाटो खोल्ने उनको भनाइ छ ।

त्यस्तै, बैठकले नेपालबाट ४० मेगावाट विद्युत् निर्यात गर्न सम्झौतापत्रमा हस्ताक्षर हुनेछ । तत्कालका लागि ४० मेगावाट बिजुली निर्यात गर्ने गरी सहमति गरिने र त्यसबाहेक अन्य जलविद्युत् आयोजनाको विद्युत् निर्यातका सम्भावनाका बारेमा पनि छलफल गरिने उनले बताए । बंगलादेशले यसअघि नै नेपालबाट बिजुली किन्न सहमति जनाइसकेको थियो ।

सचिवस्तरीय बैठकले नेपालको बिजुली बंगलादेशसम्म निर्यात गर्न भारत हुँदै लैजाने प्रसारण प्रणाली र द्वि-देशीय विद्युत् व्यापारका विषयमा सहमति र छलफल गरिने सिंहले बताए ।