विराटनगर- कोशी प्रदेश सरकारमा नवनियुक्त मुख्यमन्त्री हिक्मतकुमार कार्कीले पद तथा गोपनीयताको शपथ लिँदैछन् ।

उनलाई प्रदेश प्रमुख परशुराम खापुङले पद तथा गोपनीयताको शपथ दिलाउँदैछन् । उनको शपथपछि नेकपा एमाले र नेकपा माओवादी केन्द्रबाट एक-एक जना मन्त्री नियुक्त गरिँदैछ ।

एमालेबाट रामबहादुर मगर  र माओवादीबाट गणेश उप्रेती मन्त्री हुन लागेका हुन् ।

एमालेबाट मन्त्री बन्न लागेका मगर इलामबाट निर्वाचित सांसद हुन् । माओवादीका उप्रेती मोरङका सांसद हुन् । दुवैजना यसअघि पनि मन्त्री भइसकेका छन् । बिहीबार दुवैले विनाविभागीय मन्त्रीको शपथ लिन लागेका हुन् ।

मगर एमाले संसदीय दलका उपनेता हुन् । उनी यसअघि गत असोजमा मुख्यमन्त्री बनेका कांग्रेस नेता केदार कार्की नेतृत्वको सरकारमा मन्त्री बनेका थिए । तर, त्यसबेला कांग्रेस र माओवादी सरकारमा फर्किएपछि एमाले बाहिरिएको थियो।

उता उप्रेती पनि केदार कार्की नेतृत्वको मन्त्रिपरिषदमै थिए । २६ चैतमा एमाले र माओवादीले कार्कीको समर्थन फिर्ता लिएपछि उप्रेती बाहिरिएका थिए।