काठमाडौं- सार्वजनिक सवारी भनेपछि तपाइको मनमा के आउँछ ? कोचाकोच, भिडभाड, एकले अर्कोलाई उछिन्दै, बल प्रयोग गर्दै चढ्नु । अझ काठमाडौंको त कुरै बेग्लै । सबैभन्दा धेरै जनसंख्या भएको शहर । गाउँतिबाट आएकाहरुले देशको राजधानी भनेर निकै आशा गर्छन् । तर यहाँको सार्वजनिक सवारी देखेर उनीहरुलाई यो सहरमा एकछिन बस्न मन लाग्दैन ।

सार्वजनिक सवारीमा आवतजावत गर्ने काठमाडौंवासीको अवस्था सकसपूर्ण छ । कार्यालय आउनेजाने समयमा माइक्रोबसलगायतका सवारीमा यात्रुको कन्तबिजोग हेर्दा नै राजधानीको सवारीको दुर्दशा प्रष्ट हुन्छ ।

कोचिएका यात्रुका बीच वृद्धवृद्धा, अपांग र महिलाका लागि यात्रा दुःखद हुने गरेको छ । आरक्षित सिटमा समेत अरु बस्दा उठाउन मुस्किल पर्छ । भीडभाडमा महिलामाथि अभद्र व्यवहार हुने गरेको छ ।

तर काठमाडौंमै पनि लाइन लागेर आफ्नो पालो पर्खेर सवारी चढेको दृश्य देख्न पाइन्छ । रत्नपार्कको उत्तर रानीपोखरीतर्फबाट छुट्ने सवारीमा चढ्न लाइनमा बस्नुपर्ने हुन्छ । त्यहाँबाट निलो माइक्रो तथा बसहरु छुट्छन् । पुरानो बानेश्वर, गौशाला, चावहिल, बौद्धमहाकाली, गौरीघाट र जोरपाटी लगायत जाने सवारी त्यहाँबाट छुट्छन् ।

यातायात व्यवस्था ऐन २०४९ ले सिट क्षमता भन्दा धेरै यात्रु राख्न नपाइने र यात्रुलाई अनिवार्य टिकट दिनुपर्ने व्यवस्था गरेको छ । तर कुनै पनि यातायात समितिबाट सञ्चालन हुने सवारीले उक्त प्रावधान मानेको पाइँदैन ।

तस्बिर- चिरायु शाक्य