काठमाडौँ– पूर्वप्रधानमन्त्री एवं एकीकृत समाजवादीका सम्मानित नेता झलनाथ खनालले चलचित्र महाजात्रा उत्कृष्ट बनेको प्रतिक्रिया दिएका छन् ।

सुन्धारास्थित हलमा आइतबार विशेष शो हेरेपछि नेता खनालले चलचित्रमा वरिष्ठ कलाकार हरिवंशले निभाएको नेताको सशक्त भूमिकाले वर्तमान राजनीतिलाई गतिलो मुक्का हानेको प्रतिक्रिया दिए ।

उनले भने, ‘कलाकार भाइहरूको अभिनय एकदमै राम्रो छ । हरिवंशले नेताको भूमिका निर्वाह गरेर वर्तमान राजनीतिलाई एक मुक्का हान्नु भएको छ ।’ नेता खनालले चलचित्र उत्कृष्ट बनेको भन्दै १० मा ९ दशमलव ९ रेटिङ दिए ।

विशेष शो हेर्न वरिष्ठ चलचित्र निर्देशक तुलसी घिमिरे, बद्री अधिकारी, वरिष्ठ नायिका भुवन चन्द, नायिका गौरी मल्ल, प्रियङ्का कार्की, नायक आयुश्मान देशराज जोशी सहभागी थिए ।

प्रदीप भट्टराईको निर्देशन र लेखन रहेको चलचित्र महाजात्रा तेस्रो हप्तामा प्रदर्शन भइरहेको छ ।