काठमाडौं – भरतपुर महानगरपालिकाको सहरी सौन्दर्यसँग जोडिएको पूर्व-पश्चिम महेन्द्र राजमार्गको नारायणगढ पुलचोकदेखि टिकौली जङ्गल छेउको गोन्द्राङसम्म ६ किलोमिटर सडकलाई ६ लेन फराकिलो बनाउने काम अन्तिम चरणमा पुगेको छ ।

वि.सं. २०७७ भदौदेखि यो सडक विस्तार थालिएको थियो । तर, बजेट पर्याप्त नहुँदा सडक विस्तारको ३० प्रतिशत काम बाँकी नै थियो । हाल सो बाँकी काम सक्न आवश्यक बजेट व्यवस्थापन गरी निर्माणलाई तीव्रता दिइएको भरतपुर डिभिजन सडक कार्यालय बताएको छ ।

सुरुको सम्झौताअनुसार ०७९ फागुन १० भित्र सडक विस्तारको काम सकिनुपर्ने थियो । तर, आधा जति काममात्रै पूरा भएका कारण म्याद थपेर गत मङ्सिर २३ सम्म सक्ने लक्ष्य दिइएको थियो । थप म्यादमा पनि काम पूरा नभएपछि फेरि म्याद थपिएको छ ।

मुख्य बजार क्षेत्र भएर जाने सडक विस्तारमा ढिलाइ हुँदा सर्वसाधारणले सास्ती भोगेका छन् भने व्यापार-व्यवसाय चौपट भएको व्यवसायीहरूको गुनासो छ ।