काठमाडौं– स्वतन्त्र सांसद डा. अमरेशकुमार सिंहले सरकारकै संरक्षणमा देशको सार्वजनिक सम्पत्ति लुटिएको आरोप लगाएका छन् ।

प्रतिनिधिसभाको आजको बैठकमा बोल्दै सांसद सिंहले यस्तो आरोप लगाएका हुन् । 

उनले भने, ‘बाँसबारी छाला जुत्ता कारखानाको जग्गा हडपेको विषयमा कुरा आयो, सरकारले समात्यो पनि । तर, दुई घण्टा नबित्दै प्रधानमन्त्रीदेखि गठबन्धनको नेताहरूको आईजिपीलाई तारन्तार फोन गयो । किनकी हामी त्यही व्यापारीको पैसा खाएर बाँचिरहेका छौं । पार्टी चलाइराखेका छौं ।’

त्यस्तै उनले सरकार र राजनीतिक दलमाथि जनताको विश्वास घटेको टिप्पणी गरेका छन् । अब त्यसको आत्मसमीक्षा गर्ने बेला भएको बताए । उनले अहिले सरकारले आफै झाँक्री र आफै बोक्सीको स्टन्ट गरेको आरोप लगाए ।

उनले सत्ता गठबन्धनको कुन दलको संरक्षणमा बाल मन्दिरको जग्गा लुटिएको छ ? भनेर प्रश्न गरे । उनले भने–‘सत्ता गठबन्धनको कुन दलको कारणले छायाँ सेन्टर, म राणाकालीन डकुमेन्ट लिएर आएको छु, त्यहाँ सत्ता गठबन्धनका नेताको सेयर छ ।’

उनले अहिले देशमा विद्यमान सबैखाले बेथितिको जड नै सरकार भएको दाबी गरे ।