काठमाडौं- पोखरा एभेन्जर्सका ओपनर ब्याटर एन्ड्रिज गौसले जारी नेपाल प्रिमियर लिगकै पहिलो शतक हानेका छन् ।

लुम्बिनी लायन्सविरुद्ध विस्फोटक ब्याटिङ गरेका उनले ५४ बलमा शतक बनाएका हुन् ।

अमेरिकाका ब्याटरसमेत रहेका उनले यसअघि २० बलमा ५ चौका र ३ छक्का मदतमा अर्धशतक पूरा गरेका थिए ।

यससँगै जारी एनपीएलमा एन्ड्रिज सबैभन्दा कम बलमा अर्धशतक प्रहार गर्ने खेलाडीसमेत बनेका छन् । उनले २० बलमा ५२ रन बनाए । अब एनपीएलको पहिलो शतक पनि उनकै नाममा लेखिएको छ।

एन्ड्रिजको ब्याटिङका कारण लुम्बिनीका कप्तान रोहित पौडेलले बनाएको सर्वाधिक ९५ रन पनि ओझेलमा परेको छ ।

उता पोखराकै दिनेश खरेलले पनि एन्ड्रिजसँग गतिलो साझेदारी गर्दै ४६ बलमा ६१ बनाएका छन् । उनले ४ चौका र ४ छक्का पनि हाने।

यसअघि प्रतियोगितामा सूदरपश्चिका कप्तान दीपेन्द्रसिंह ऐरीले कम बल २३ बलमा अर्धशतक हानेका थिए । उनले २३ बलमा विराटनगर किङ्सविरुद्ध अर्धशतक पूरा गरेका थिए ।

जारी एनपीएलमा अर्धशतक हान्ने दिनेश ११ औँ खेलाडी बनेका छन् । यसअघि चितवनका रवि बोपाराले दुई अर्धशतक प्रहार गरिसकेका छन् । रोहित पौडेल ब्रान्डन म्याकमुलेन, लोकेश बम, शिखर धवन, रवि बोपारा, दीपेन्द्र सिंह ऐरी, अनिल साह, लाहिरु मिलान्था र मार्टिन गप्टिलले अर्धशतक प्रहार गरेका थिए ।