काठमाडाैं- प्रधानमन्त्री केपी शर्मा ओली आफ्नो तेस्रो कार्यकालको पहिलो विदेश भ्रमणका लागि अमेरिकामा जाने भएका छन् ।
मन्त्रिपरिषद्को बिहीबारको बैठकले राष्ट्रसंघीय महासभामा भाग लिन जान लागेका प्रधानमन्त्रीको अमेरिका भ्रमण स्वीकृत गरेको हो ।
मन्त्रिपरिषद् बैठकले राष्ट्रसंघको महासभाका लागि प्रधानमन्त्री ओली न्यूयोर्क जाने कार्यक्रम स्वीकृत गरेको हो ।
परराष्ट्र मन्त्रालयका अनुसार भ्रमण टोलीमा प्रधानमन्त्रीसहित पत्नी राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका प्रमुख सल्लाहकार विष्णु रिमाल, प्रधानमन्त्रीका निजी चिकित्सक डा. दिव्या सिंह र प्रमुख स्वकीय सचिव राजेश बज्राचार्य छन् ।
त्यसैगरी भ्रमणटोलीमा परराष्ट्र मन्त्रालयका सचिव सेवा लम्साल, सह-सचिव अमृतबहादुर राई, शिष्टाचार महापाल विष्णुप्रसाद गौतम, उपसचिव प्रथमा उप्रेती, अधिकृतद्धय भुवन ओझा र प्रविण भट्टराई पनि छन् ।
यो टोलीमा प्रधानमन्त्रीका सुरक्षाकर्मी नेपाली सेनाका प्रमुख सेनानी दिवाकर खड्का, नेपाल प्रहरीका डिएसपी नविन कार्की र प्रधानमन्त्रीका समाचार संयोजक प्रकाश सिलवाल पनि छन् ।
प्रधानमन्त्रीसँगै निजी फोटोग्राफर दिनेश भण्डारी र नेपाल टेलिभिजनका क्यामरा पर्सन अनन्त चालिसे पनि जाँदैछन् ।
राष्ट्रसंघको महासभा आगामी भदौ २५ देखि असोज १२ गतेसम्म न्यूयोर्कमा हुँदैछ । प्रधानमन्त्री ओली महासभामा सम्बोधनका लागि असोज ४ गते न्यूयोर्क जाने कार्यसूची छ ।
प्रतिक्रिया