काठमाडौं-तनहुँको ब्यास नगरपालिकाका मेयर बैकुण्ठनाथ न्यौपाने २०७९ वैशाखमा भएको निर्वाचनको मतगणना फेरि गराउने उच्च अदालत पोखराको आदेशविरुद्ध सर्वोच्च अदालत पुगेका छन् ।

उच्च अदालतले यही असार २ गते पुन: मतगणना गर्नु भनी दिएको आदेशविरुद्ध अन्तरकालीन आदेश माग गर्दै मेयर न्यौपानेले सर्वोच्चमा रिट हालेका हुन् । यो रिटको पेशी आइतबारलाई तोकिएको छ ।

ब्यास नगरपालिकामा मेयर पदको निर्वाचनको मतगणना यही असार २ गते दोहोर्‍याएर गर्न उच्च अदालत पोखराले आदेश दिएको थियो।

उच्च अदालतका न्यायाधीश राजनप्रसाद भट्टराई र निर्मला पौडेल भट्टराईको संयुक्त इजलासले पुनःमतगणना गर्नुपर्ने फैसला गरेको थियो । फैसलामा असार २ गते बिहान १० बजेदेखि पुनःमतगणना गर्न अदालतले भनेको थियो ।

२०७९ वैशाखमा भएको निर्वाचनमा नगरपालिका प्रमुखमा स्वतन्त्र उम्मेदवारी दिएर पराजित दीपकराज जोशीले पुनःमतगणना माग गर्दै उच्च उदालत पोखरामा मुद्दा दिएका थिए ।

पहिलो पटक मतगणना हुँदा धाँधली भएको प्रष्ट देखिएको जोशीले बताइरहेका छन् । उच्च अदालतले नै निर्वाचन आयोगबाट सम्पूर्ण कागजपत्र मगाएर अध्ययन गर्दा निर्वाचनमा खसेको मत र बदर मत जम्मा मतसँग नमिलेको फैसला दिएको थियो ।

मत नमिलेको देखिएपछि पुन:मतगणना गर्नुपर्ने फैसला गरिसकेपछि विपक्षीहरूले त्यसो गर्नु हुँदैन भनेर अन्तरिम आदेशका लागि सर्वोच्चमा निवेदन दिनु धाँधली भएको कुरालाई प्रष्ट पार्नु भएको जिकिर जोशीले गरेका छन् ।