काठमाडौं– मन्त्रिपरिषद्को बैठक अहिले सिंहदरबारमा बसिरहेको छ । 

मन्त्रिपरिषद् बैठकले प्रधानमन्त्री पुष्पकमल दाहाल प्रचण्डको शनिबारदेखि हुने भारत भ्रमणलाई अनुमोदन गर्ने छ ।

भारतीय प्रधानमन्त्री नरेन्द्र मोदीको शपथ ग्रहण समारोहमा सहभागी हुन प्रचण्ड नयाँ दिल्ली जान लागेका हुन् ।

उनले मन्त्रिपरिषद् बैठकमा उक्त भ्रमण कार्यक्रमबारे जानकारी गराउने भएका छन् ।

मोदीले आफूले तेस्रो कार्यकाल सम्हाल्न लागेको भन्दै प्रचण्डलाई बुधबार फोन गरेर शपथ ग्रहण समारोहमा सहभागिताका लागि निम्तो दिएका थिए ।

यद्यपि एनडीए गठबन्धनमा कुरा नमिलिसकेकाले मोदीले शनिबारको साटो आइतबार मात्रै शपथ लिने भएका छन्।

परराष्ट्र मन्त्रालयले प्रधानमन्त्री प्रचण्डको भारत भ्रमणका लागि आवश्यक तयारी भइरहेको जनाएको छ । 

मन्त्रिपरिषद्को यो बैठकले नेपाली कांग्रेससहितको तत्कालीन गठबन्धन सकारका पालामा नियुक्त राजदूतहरू फिर्ता बोलाउने पनि सम्भावना छ । फिर्ता बोलाउन लागिएकाहरू कांग्रेसको कोटाबाट नियुक्त छन् ।