काठमाडौं- दुई दर्जनभन्दा बढी अन्तर्राष्ट्रिय फिल्म महोत्सवमा सहभागी भएको फिल्म ‘गाउँ आएको बाटो’को बुधबार काठमाडौंमा रेड कार्पेटसहितको प्रिमियर गरिएको छ ।

कमलपोखरीस्थित एक हलमा गरिएको प्रिमियरमा राजनीतिज्ञ, सिनेकर्मी र किरात राई समुदायका प्रतिनिधि तथा सर्वसाधारणसमेत उपस्थित थिए ।

त्यसक्रममा उक्त हलमा किरात राई समुदायको साकेला नाच पनि प्रस्तुत गरिएको थियो ।

यो फिल्म किरात राई समुदायको तल्लो वर्गको एक परिवारमा आधारित कथा हो । त्यहीकारण किराती संस्कृति झल्किने झाँकी र नाचसहित फिल्मको प्रिमियर गरिएको हो ।

मुख्य कलाकारहरू दयाहाङ राई, पशुपति राई र बालकलाकार प्रसन्न राईले प्रिमियरमा उपस्थित भएकाहरूसँगै बसेर फिल्म हेरेका थिए ।

चलचित्र निर्देशक दिनेश डीसी, निश्चल बस्नेत, नायिक स्वस्तिमा खड्का, आँचल शर्मा, सुरक्षा पन्त, मिरूना मगर लगायतका सेलिब्रिटीले उक्त फिल्म हेरे ।