काठमाडौं- नेकपा एमालेका अध्यक्ष केपी शर्मा ओलीले तत्कालीन नेकपा विवाददेखि निष्क्रिय बसेका तत्कालीन उपाध्यक्ष वामदेव गौतमलाई पार्टीमा स्वागत गर्न सकिने संकेत गरेका छन् ।

‘सिद्धिनाथ ज्ञवाली स्मृति ग्रन्थ’ विमोचन कार्यक्रममा आफूभन्दा पहिले बोलेका गौतमलाई जवाफ दिने क्रममा उनले यस्तो संकेत गरेका हुन् ।

वामदेवले ८ महिनाअघि च्यासलमा भएको वार्तामा ओलीले हाई लेभलको निर्णयबाट पार्टीमा स्वागत गर्ने बताएर अझैसम्म नबोलाएको गुनासो गरेका थिए । उनले विगतका गल्तीलाई लिएर आफू आत्मआलोचित हुन तयार रहेको बताउँदै एमालेमा जिम्मेवारी दिएर फर्काउन आग्रह गरेका थिए ।

‘वामदेव कमरेडले कतिपय कुराहरू उठाउनु भएको छ ।अहिले उहाँले उठाएका कुराबारे छलफल गर्ने यो थलो होइन । पछि हामी यसबारेमा छलफल गर्छौँ’, उनले भने, ‘वामदेवजीको जुन एकताको भावना छ, त्यो सकारात्मक छ, त्यस भावनालाई अघि बढाऊँ ।’

उनले वामदेव अहिले ‘राष्ट्रिय एकता महाअभियान’को अध्यक्ष रहेको भन्दै उनलाई अभियान सफलताको शुभकामनासमेत दिए ।