काठमाडौं– पाकिस्तानको खैबर पख्तुनख्वा प्रान्तमा लडाकुको आक्रमणमा परी यो वर्ष ज्यान गुमाउने प्रहरीको सङ्ख्या एकसयभन्दा धेरै रहेको पाइएको छ । प्रान्तमा लडाकुले यो वर्ष २ सय ३० भन्दा धेरै आक्रमण गरेका छन् ।

यो वर्ष प्रान्तमा विभिन्न किसिमका ४ सय ९२ वटा लडाकु गतिविधि भएको खैबर पख्तुनख्वाको प्रतिआतङ्कवाद विभागले सार्वजनिक गरेको तथ्याङ्कमा जनाइएको छ ।

विभागको प्रतिवेदन उद्धृत गर्दै पाकिस्तानबाट प्रकाशित हुने द एक्सप्रेस ट्रिब्युन अखबारका अनुसार प्रान्तको दक्षिणी जिल्लाहरूमा लडाकुका गतिविधि धेरै देखिएको छ ।

यस वर्ष विभागको कारवाहीमा परी १४ जना मोस्ट वान्टेड लडाकु मारिएका छन् । कारवाहीमा परी मृत्यु हुने लडाकुमा ८ जना वरिष्ठ कमाण्डर पनि रहेको ट्रिब्युनले जनाएको छ ।