काठमाडौं– संस्कृति पर्यटन तथा नागरिक उड्डयनमन्त्री बद्री पाण्डेले सुदूरपश्चिम प्रदेश धार्मिक पर्यटन क्षेत्रका रूपमा निकै महत्वपूर्ण र धनी रहेको बताएका छन् ।

आज सुदूरपश्चिम पर्यटन व्यवसायीहरूसँगको छलफलका क्रममा मन्त्री पाण्डेले सुदूरपश्चिम पर्यटकीय रूपमा धनी भए पनि राज्यबाट पछि परेको बताए । उनले मानव विकास सूचकांकका दृष्टिकोणले समेत पछाडि परेको उल्लेख गरे । मन्त्री पाण्डेले यस क्षेत्रको विकास लागि राजनीति दल र सरोकारवालाहरूसँग छलफल गरेर अघि बढ्ने बताए ।

मन्त्री पाण्डेले पाँच सय भन्दा बढी पर्व र १३० वटा भाषा भएको उल्लेख गर्दै भाषा सभ्यता, संस्कृति, भेषभुषा र पर्यटकीय दृष्टिकोणले मुलुक धनी भएको बताए ।

संस्कृति र पर्यटनलाई चलायमान बनाउने र त्यसलाई सुनिश्चित बनाउनका लागि नागरिक उड्डयनको क्षेत्रलाई प्रभावकारी बनाउन सके देशमा आर्थिक वृद्धि हुने उल्लेख गरे । उनले मन्त्रालयको समग्र विषयवस्तु बुझिसकेको र अब प्राथमिकीकरणका आधारमा अघि बढ्ने समेत बताए ।