काठमाडौं – आफू नेतृत्वको जनता समाजवादी पार्टी विभाजन हुँदै गर्दा अध्यक्ष उपेन्द्र यादव भने यतिबेला अमेरिकाबाट फर्किँदै छन् ।

जसपा नेपालका अध्यक्ष एवम् उपप्रधानमन्त्री तथा स्वास्थ्य तथा जनसंख्यामन्त्री उपेन्द्र यादव गत शनिबार अमेरिका गएका थिए ।

अप्रिल ३० देखि मे ३ तारिखसम्म यूएन सेक्रेटरियट न्यूयोर्कमा हुने विश्व जनसंख्यासम्बन्धी सम्मेलनमा नेपालको प्रतिनिधिका रूपमा सहभागी हुन यादव शनिबार बेलुकी अमेरिका गएका थिए ।

उनले त्यहाँ राष्ट्रसंघीय महासचिव एन्टेनियो गुटरेससहितसँग भेट पनि गरे । राष्ट्रसंघको कार्यक्रममा सहभागी भए उनी मे ७ तारिख अर्थात् मंगलबार स्वदेश आइपुग्ने कार्यतालिका छ ।

त्यहीअनुसार उनी अमेरिकाबाट नेपाल प्रस्थान गरिसकेका छन् । यादव सोमबार कतार आइपुग्ने छन् । तर यता नेपालमा भने यादवलाई थाहै नदिई ७ जना सांसदले जसपा विभाजित गरेका छन् ।

जसको नेतृत्व पूर्वशिक्षामन्त्री एवम् वरिष्ठ नेता अशोक राईले गरेका छन् । राई नेतृत्वका सांसदहरू अहिले निर्वाचन आयोगमा जसपा नामको नयाँ दल दर्ताका लागि पुगिसकेका छन् ।

आफ्नो अनुपस्थितिमा अध्यक्ष यादवले पार्टीका केन्द्रीय कार्यकारिणी समिति सदस्य राजेन्द्रप्रसाद श्रेष्ठलाई कार्यवाहक अध्यक्षको जिम्मेवारी तोकेका थिए ।

अशोक राई नेतृत्वको नयाँ पार्टीमा प्रदीप यादव, राजकिशोर यादव र सुशीला श्रेष्ठ जोडिइसकेका छन् । अन्य तीनजना सांसदबारे उनीहरूले केही खुलाएका छैनन् ।