काठमाडौं- नेपाली कांग्रेसको केन्द्रीय कार्यसम्पादन समितिको बैठक सकिएको छ ।

पार्टी सभापति शेरबहादुर देउवा निवास बूढानिलकण्ठमा बसेको बैठकमा पछिल्लो समय विकसित घटनाक्रमबारे छलफल भएको सहमहामन्त्री बद्री पाण्डेले जानकारी दिए ।

बैठकले प्रधानमन्त्री पुष्पकमल दाहाल प्रचण्डले जनताको म्यान्डेटलाई दोस्रोपटक गम्भीर कुठराघात गरेको निष्कर्ष निकालेको उनको भनाइ छ ।

बैठकले सरकारलाई दिएको विश्वासको मत फिर्ता लिने र विपक्षमा बस्ने पनि निर्णय गरेको छ । बैठकले सरकारलाई दिएको समर्थन फिर्ता लिने र सदनमा सशक्त प्रतिपक्षीको भूमिका निर्वाह गर्ने निर्णय भएको कांग्रेस प्रवक्ता डा प्रकाशशरण महतले जानकारी दिए ।

प्रधानमन्त्रीको निर्णयले मुलुकलाई थप अस्थीरता तर्फ लगेको र अर्थतन्त्रलाई पनि अप्ठेरो अवस्थामा ढकेलेको बैठकको निष्कर्ष रहेको उनको भनाइ छ ।

उनले कांग्रेससँगको गठबन्धन तोड्दा प्रधानमन्त्रीले लगाएका आरोपहरु कपोकल्पित भएको जिकिर गरे । गठबन्धन तोड्ने प्रधानमन्त्रीको निर्णय निर्वाचनका बेला जनतासंग गरेका प्रतिवद्धता विपरित रहेको उनको भनाइ छ ।

कांग्रेसका कारण गठबन्धन परिवर्तन नभएको पनि उनले स्पष्ट पारे ।