काठमाडौं- नेपाल उद्योग वाणिज्य महसंघको पहलमा तयार भएको स्टार्टअप नीति पारित भएकोमा महासंघले खुसी व्यक्त गरेको छ । उद्योग वाणिज्य महासंघले दुई वर्ष अगाडि स्टार्टअप नीतिको मस्यौदा तयार गरेको थियो, त्यसमाथि व्यापक छलफल पश्चात सरकारले सो नीति पारित गरेकोमा महासंघले खुसी व्यक्त गरेको हो ।

 मंगलबार नीति संवाद कार्यक्रममा बोल्दै महासंघका अध्यक्ष चन्द्र प्रसाद ढकालले सो विषय स्टार्टअप विस्तारमा महत्वपूर्ण कोशेढुङ्गा भएको बताए । उनले नीति  संवाद कार्यक्रमलाई सम्बोधन गर्दै स्टार्टअपका सन्दर्भमा आफ्नै पछिल्लो इतिहासलाई जोड्दै नीति ल्याउन लामो समयदेखिको महासंघ स्टार्टअप एण्ड ईन्नोभेशन फोरम, मन्त्रालय लगायतको अमूल्य योगदान रहेको र यो धेरै नै छलफलहरुबाट निकै खारिएर आएकोले स्टार्टअप व्यवसायका लागि महत्वपूर्ण हुने विचार व्यक्त गरे । 

त्यस्तै, उद्योग, वाणिज्य तथा आपूर्ति मन्त्रालयका सहसचिव जीवलाल भूषालले नीतिले अंगिकार गरेको स्टार्टअपको परिभाषा, स्टार्टअप र लघु, घरेलु तथा साना उद्योग र स्टार्टअप उद्यमका अन्तर सम्बन्धहरू, स्टार्टअप वर्ष २०३० र स्टार्टअप कर्जाहरुका विषयमा प्रकाश पारेका थिए ।