नयाँ दिल्ली- लोकसभा चुनावको मतगणनासँगै आइरहेको रुझानमा भारतीय जनता पार्टी नेतृत्वको एनडीए गठबन्धनले तीनवटा राज्यबाट धक्का ब्यहोरेको छ ।

भाजपा नेतृत्वको एनडीएलाई बहुमत मिल्ने देखिए पनि उसले आफ्नो गढ उत्तर प्रदेशमा ठूलो धक्का ब्यहोरेको छ ।

मध्यान्ह १२ बजेसम्मको रुझानअनुसार एनडीए ३०० सिटनजिक पुगेको छ । अहिले उसले २९४ सिटमा अग्रता बनाएको छ ।

उता भारतीय कंग्रेस नेतृत्वको इन्डिया गठबन्धन २३० सिटमा अग्रता बनाइरहेको छ । रुझानअनुसार एनडीएलाई बहुमत त मिलेको देखिएको छ तर भाजपाको एकल बहुमत भने मुस्किल भएको छ ।

भाजपाका लागि उत्तर प्रदेशसहित केही राज्यमा तनाव दिने खबर छ । पाँच राज्यमा ठूलो उलटफेर हुने सम्भावना बढेको छ ।

सबैभन्दा उलटफेर उत्तर प्रदेशमा देखिएको छ । रुझानअनुसार यहाँ अखिलेश यादव नेतृत्वको समाजवादी पार्टी सबैभन्दा ठूलो पार्टी बन्ने सम्भावना देखिएको छ ।

यहाँका ८० सिटमा इन्डिया गठबन्धन ४५ सिटसहित अगाडि छ । जबकि एनडीए ३६ सिटमा अगाडि छ । यहाँ समाजवादी पार्टी एक्लैले ३६ सिपमा अग्रता बनाएको छ ।

महाराष्ट्रमा पनि एनडीएको अवस्था खराब छ । एनडीए अहिले १६ सिटमा अगाडि छ । जबकि इन्डिया गठबन्धन ३१ सिटसहित अग्रता बनाइरहेको छ । अरु दलले एक सिटमा अग्रता बनाइरहेका छन् । यहाँ सन् २०१९ मा भाजपाले ६२ सिट जितेको थियो ।

पश्चिम बंगालमा पनि दिदी ममता बनर्जीको जादु चलेको छ । भाजपालाई यहाँ पनि क्षति मात्रै मिलेको छ । त्रिणमूल कंग्रेस सबैभन्दा धेरै २६ सिटमा अगाडि छ । यहाँ भाजपा १३ र कांग्रेस २ सिटमा अगाडि देखिएका छन् ।

अर्को राज्य हरियाणामा पनि इन्डिया गठबन्धन बलियो देखिएको छ । अहिले त्यहाँ कांग्रेस ६ सिटमा अगाडि छ । उता भाजपा केबल ४ सिटमा अगाडि छ ।

राजस्थानमा पनि ठूलो उलटफेरको संकेत आएको छ । जहाँ भाजपालाई ठूलो क्षति हुने देखिएको छ । यहाँ भाजपा १३ सिटमा र कांग्रेस १२ सिटमा अगाडि छन् ।