तनहुँ – जिल्लाका तीन पालिका जोड्ने लोचाडाँडा कृषि पर्यटन मार्गमा कालोपत्र गरिएको छ । व्यास नगरपालिका–५ मानुङकोट, म्याग्दे गाउँपालिका–१ धारादी र भीमाद नगरपालिका जोड्ने उक्त मार्गमा कालोपत्र गरिएको हो ।

व्यास र म्याग्देको मुख्य मार्ग रहेको यस मार्गलाई भीमादमा जोडिएको छ । गण्डकी प्रदेशको भौतिक पूर्वाधार विकास तथा यातायात व्यवस्था मन्त्रालयअन्तर्गत कृषि पर्यटन मार्गको निर्माण अघि बढाइएको हो ।

उक्त मार्गको करिब २२ किलोमिटरअन्तर्गत एक हजार तीन सय मिटर कालोपत्र र दुई सय मिटर सडक ढलान गरिएको पूर्वाधार विकास कार्यालयले जनाएको छ । ठेक्का सम्झौतालगत्तै पर्याप्त मजदुर, उपकरण परिचालन र निर्माण सामग्री व्यवस्थापन गरी लक्ष्यअगावै कालोपत्र कार्य सम्पन्न गरिएको निर्माण कम्पनीका सञ्चालक सुवासचन्द्र कार्कीले जानकारी दिए।

मङ्गलादेवी सुवास कन्स्ट्रक्सन कम्पनीले विसं २०७९ फागुन १४ गते सो सडक निर्माणका लागि रु चार करोड ४३ लाख ४० हजार पाँच सय २८ मा ठेक्का सम्झौता गरेको थियो । उक्त मार्गले तीन पालिकाका बासिन्दा प्रत्यक्ष लाभान्वित हुनेछन् । सडक कालोपत्र भएसँगै धुलो र हिलोबाट मुक्ति पाउँदा स्थानीय बासिन्दा खुसी भएका छन् ।

निर्माण कार्य पूरा भएको उक्त योजनाको अनुगमन गरेर निर्माण कम्पनीलाई काम सम्पन्न भएको प्रमाणपत्र र अन्तिम भुक्तानी प्रदान गरिएको पूर्वाधार विकास कार्यालयका प्रमुख कृष्ण आचार्यले बताए।

त्यसैगरी, व्यास–११ मा सञ्चालित बाराही–रानीमार्ग आठ महिनाअगावै सम्पन्न गरिएको छ । एक हजार सात सय मिटर ‘प्रिमिक्स’ किसिमको कालोपत्र सम्झौता अगावै सम्पन्न गरिएको हो । निर्माण कम्पनी मङ्गलादेवी सुवास कन्स्ट्रक्सनले निर्माण थालेको उक्त दुवै योजनाको निर्माण कार्य लक्ष्य अगावै सम्पन्न भएको हो ।