काठमाडौं- काठमाडौं महानगरपालिका प्रमुख बालेन्द्र साहले सामाजिक सञ्जाल फेसबुकमा राखेको पोस्ट सरकारको मिलेमतोमा उडाइएको आरोप लगाएका छन् ।

बालेनले नेकपा एमालेकी प्रदेश सभा सदस्य रेखाकुमारी शर्माले बाल श्रम शोषण गरेको विषय सामाजिक सञ्जाल फेसबुकमार्फत सार्वजनिक गरेको विवरण सरकारकै मिलेमतोमा उडाइएको आरोप लगाएका हुन् ।

मंगलबार भएको कार्यपालिका बैठकमा वडाअध्यक्षहरू र उपमेयर सुनिता डंगोलले पनि चर्को आलोचना गरेलगत्तै बालेनको उक्त पोस्ट आएको हो ।

कार्यपालिका बैठकमा कार्यपालिका सदस्यहरूले बालेनको कार्यशैलीलाई लिएर विरोध जनाएका थिए । उपमेयर डंगोलले महानगरको नेतृत्वको कार्यशैलीका कारण जनताले घेर्न आउन थालेको बताएकी थिइन् ।

प्रदेश सभा सदस्य शर्माले ती नाबालिकालाई ८ वर्षदेखि श्रम शोषण गरेर यातना दिएको दाबि बालेनले गरेका थिए । तर एमाले कार्यकर्ताहरूले बालेनलाई चुनौती दिँदै पुष्टि गर्न र अदालतको फैसलालाई गलत ब्याख्या नगर्न चुनौती दिएका थिए ।

तर बालेनको उक्त पोस्टमा अत्यधिक रिपोर्ट परेपछि फेसबुकले कम्युनिटी गाइडलाइन कायम नभएको भन्दै हटाइदिएको थियो । फेसबुकले हटाइदिएको उक्त पोस्टबारे बालेनले लेखेका छन्, ‘पोस्ट उडाउने होइन, दोषी समाउ सरकार !’

उनले आफू गलत भए समातेर देखाउन पनि  एमाले अध्यक्ष केपी शर्मा ओली नेतृत्वको सरकारलाई चुनौती दिएका छन् । नभए दोषी समात्न उनले सरकारलाई उनले दवाब दिएका छन् । ‘म गलत हो भने मलाई समाऊ, होइन भने दोषी समाऊ,’ उनले भनेका छन् ।