काठमाडौं- सत्तारुढ राष्ट्रिय स्वतन्त्र पार्टी (रास्वपा) ले महामन्त्री डा. मुकुल ढकालको प्रस्ताव शतप्रतिशत केन्द्रीय सदस्यहरूबाट अस्वीकार भएपछि केन्द्रीय समिति बैठकको प्रत्यक्ष प्रशारण रोकिएको प्रष्टीकरण दिएको छ ।

खानपिनका लागि बैठक केही समय स्थगित गरिएपछि रास्वपाले सभापति रवि लामिछाने सहमत हुँदाहुँदै पनि शतप्रतिशत केन्द्रीय सदस्यहरूको असहमतिका कारण बैठक प्रत्यक्ष प्रशारण गर्नुपर्ने महामन्त्री ढकालको प्रस्ताव अस्वीकृत भएको जनाएको हो ।

‘महामन्त्रीज्यूले प्रतिवेदन लाइभ गरेर प्रस्तुत गर्ने सर्त राख्नुभएको थियो । सभापतिज्यूले त्यसमा सहमति जनाउनुभयो तर शतप्रतिशत केन्द्रीय सदस्यबाट अस्वीकार भयो,’ सहप्रवक्ता मनिष झाले भने ।

झाका अनुसार प्रस्ताव अस्वीकृत भएपछि महामन्त्री ढकालले मुखमा मास्कमाथि कालो टेप लगाएर विरोध जनाएका हुन् ।

‘लाइभ नगर्ने भनिएपछि विरोधस्वरूप उहाँ (महामन्त्री) ले मुखमा माक्स लगाएर त्यसमाथि कालो टेप लगाएर बस्नुभयो,’ उनले भने ।

महामन्त्री ढकालले मुखमा मास्कमाथि कालोटेप लगाएर बसेपछि उनको प्रतिवेदन सहमहामन्त्री कविन्द्र बुर्लाकोटीले वाचन गरेको झाको भनाइ छ । खाना खानका लागि स्थगित भएको बैठक सुरु भएपछि ईच्छाअनुसार सबैले आ–आफ्नो धारणा राख्ने उनले बताए ।