काठमाडौं – सत्ता गठबन्धनको बैठक सोमबारका लागि बोलाइएको छ । बैठक सोमबार बिहान ८ बजे बस्ने गरी बोलाइएको प्रधानमन्त्री तथा मन्त्रिपरिषदको कार्यालयले जनाएको छ । गठबन्धनमा खटपट आएको चर्चा चलिरहेका बेला बैठक बोलाइएको हो ।
बैठकमा मन्त्री हेरफेर, राष्ट्रिय सभा अध्यक्षको निर्वाचन र सत्य निरूपण तथा मेलमिलाप र बेपत्ताहरूको छानबिन आयोगसम्बन्धी (टीआरसी) विधेयक लगायतको विषयमा छलफल हुने छ ।
बिहान आठ बजे नेपाली कांग्रेस, नेकपा माओवादी केन्द्र, एकीकृत समाजवादी र जनता समाजवादी बीच बैठक बस्ने बालुवाटार स्रोतले जनाएको छ । चारदलको बैठक पछि गठबन्धनका अन्य दललाई सहभागी गराइने छ ।
कांग्रेस महासमिति बैठकमा सत्ता गठबन्धनप्रति कांग्रेस नेताहरुले व्यक्त गरेको धारणाका कारण माओवादी असन्तुष्ट छ । टिआरसी विधेयकमा कांग्रेसले असहयोग गरेको माओवादी नेताहरुले बताउन थालेका छन् ।
टिआरसी विधेयक लगायतका विषयमा कांग्रेसले सरकारलाई साथ नदिएको माओवादीका एक पदाधिकारीले बताए । राष्ट्रियसभा अध्यक्षको निर्वाचनअघि सत्ता समीकरण परिवर्तन हुन सक्ने ती पदाधिकारीले संकेत गरे ।
गठबन्धनमा खटपट आएको चर्चाकै बीच आइतबार बिहान प्रधानमन्त्री तथा नेकपा माओवादी केन्द्रका अध्यक्ष प्रचण्ड र कांग्रेस सभापति शेरबहादूर देउवाबीच भेटवार्ता भएको थियो । उक्त भेटवार्तामा कांग्रेस महासमिति बैठकमा सत्ता गठबन्धनबारे उठेका विषयका बारेमा समेत छलफल गरिएको बताइएको छ ।
त्यस्तै प्रचण्डले आइतबार बिहान र साँझ एमाले अध्यक्ष केपी शर्मा ओलीसँग पनि छलफल गरेका छन् । भेटवार्तामा टिआरसी विधेयक लगायतको विषयमा छलफल भएको बताइएको छ ।
पछिल्लो समय बढेको राजनीतिक गतिविधिलाई अर्थपूर्ण रूपमा हेरिएको छ ।
याे पनि…
प्रतिक्रिया