काठमाडौं – राप्रपा नेपालका अध्यक्ष कमल थापाले राष्ट्रवादी दल र शक्तिहरुलाई एकतावद्ध हुन आह्वान गरेका छन् ।

सोमबार काठमाडौंमा आयोजित एक कार्यक्रममा बोल्दै थापाले जनताले अहिले विकल्प खोजिरहेको अवस्थामा राष्ट्रवादी शक्तिहरु एकतावद्ध हुनुपर्ने बताएका हुन् ।

उनले विगतका त्रुटि कमजोरीहरुबाट पाठ सिकेर नयाँ ढंगले बलियो वैचारिक राष्ट्रवादी प्रजातान्त्रिक शक्ति निर्माण गर्नुपर्ने धारणा राखे ।

एकताको पूर्वसर्त आत्मीयता भएकाले विगतमा भएका कमजोरीलाई दोहोर्‍याएर एकता हुन नसक्ने उनको भनाइ छ ।

राष्ट्रवादी भन्ने दलहरुले आत्मसमीक्षा गर्नुपर्ने थापाले बताए। उनले कांग्रेस–एमालेविरुद्ध जनता उत्रिएको देखिए पनि उनीहरुकै पक्षमा मत दिन जनता बाध्य भएकाले नयाँ शक्ति आवश्यक रहेको उल्लेख गरे ।

थापाले रवि लामिछानेको गिरफ्तारी प्रकरणतर्फ संकेत गर्दै विभिन्न प्रकरणमा अनुसन्धान लम्ब्याउने  काम भएको र प्रहरीले पक्राउ गरेकाहरुलाई मानसिक तनाव दिने काम भएको आरोपसमेत लगाए।