काठमाडौं– नेपाली कांग्रेसले भ्रातृ संस्थाहरूका महाधिवेशन सम्पन्न गर्नका लागि ‘महाधिवेशन केन्द्रीय निर्देशन समिति’ गठन गरेको छ । 

कांग्रेसले नेपाल महिला संघ, नेपाल तरुण दल र नेपाल विद्यार्थी संघ (नेविसंघ) को महाधिवेशन आगामी चैत मसान्तसम्म सम्पन्न गर्ने गरी ‘महाधिवेशन केन्द्रीय निर्देशन समिति’ गठन गरेको हो । 

तीन वटै भ्रातृ संस्थाहरूका तदर्थ समितिलाई समन्वय र सहयोग पुर्‍याई आवश्यक निर्देशनसमेत गर्न सभापति शेरबहादुर देउवाले पार्टी विधानको धारा २५ (९) बमोजिम ‘महाधिवेशन केन्द्रीय निर्देशन समिति’ गठन गरेको कांग्रेसले जनाएको छ । 

कांग्रेस केन्द्रीय कार्यसमितिको गत साउन २३ को निर्णयअनुसार महिला सङ्घ, तरुण दल र नेविसङ्घले आगामी चैत मसान्तसम्ममा अनिवार्य रुपमा महाधिवेशन सम्पन्न गरिसक्नु पर्ने कार्यवाहक मुख्य सचिव डा. प्रदिप पराजुलीले जानकारी दिए । 

सभापति देउवाले उपसभापति उमाकान्त चौधरीलाई महिला सङ्घको महाधिवेशनका लागि ‘महाधिवेशन केन्द्रीय निर्देशन समिति’ संयोजक तोकेका छन् । समितिमा केन्द्रीय सदस्यद्वय पुष्पा भुसाल र रुक्मिणी कोइराला सदस्य छन् । 

यस्तै सहमहामन्त्री महालक्ष्मी उपाध्याय ‘डिना’ को संयोजकत्वमा तरुण दल महाधिवेशन केन्द्रीय निर्देशन समिति गठन गरिएको छ । उपाध्याय नेतृत्वको समितिमा केन्द्रीय सदस्यद्वय सरिता प्रसाईं र जीतजंग बस्नेत सदस्य छन् । 

सभापति देउवाले सहमहामन्त्री किशोरसिंह राठौरको संयोजकत्वमा नेविसंघ महाधिवेशन केन्द्रीय निर्देशन समिति गठन गरेका छन् । उनको समितिमा केन्द्रीयहरू राजिव ढुंगाना र प्रतिमा गौतमलाई सदस्यको जिम्मेवारी दिइएको छ ।