काठमाडौं- संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले वर्तमान सरकार ०८४ सम्मै जाने बताएका छन् ।

सोमबार राजधानीमा आयोजित ट्रेकिङ ऐजेन्सिज एशोशियसन अफ नेपाल (टान)को ४६ औं वार्षिक साधरणसभा समारोहलाई सम्बोधन गर्दै मन्त्री पाण्डेले यसो भनेका हुन् ।

उनले असार १७ गतेको समहतिअनुसार यो सरकारले आगामी चुनावसम्मै निरन्तरता पाउने बताए । ‘यो सरकार ८४ सम्म नै रहन्छ । सरकारलाई स्थायी रूपमा लिन चाहान्छौँ’, उनले भने, ‘आवश्यकताअनुसार अन्य दलहरूलाई समेत साथमा लिन सकिन्छ ।’

पाण्डेले चुनाव अघिसम्म यो सरकारले निरन्तरता पाएपछि ०८४ मा कांग्रेस र एमालेले प्रतिस्पर्धा गर्ने बताए । ‘०८४ को चुनावमा एमाले र कांग्रेसबीच प्रतिस्पर्धा हुन्छ’, उनले भने, ‘कांग्रेस-एमाले मिलेर आवश्यकता अनुसार जोखिम मोल्न चाहान्छौँ ।’

मन्त्री पाण्डेले पर्यटन क्षेत्रको विकासका लागि निजी क्षेत्रसँग सहकार्य गर्न तयार रहेको पनि उक्त कार्यक्रममा बताएका छन् ।

उनले संस्कृति, पर्यटन तथा नागरिक उड्डयन क्षेत्रको विकास र प्रवर्द्धनका लागि निजी क्षेत्रको भूमिका अपरिहार्य रहेको बताए ।

‘मन्त्रालय निजी क्षेत्रसँग सहकार्य गरेर पर्यटन क्षेत्रको विकास गर्न तत्पर छ । पर्यटन क्षेत्रको विकासका लागि निजी क्षेत्रको भूमिका महत्वपूर्ण छ’, उनले भने ।

मन्त्री पाण्डेले पर्यटन क्षेत्रको विकासमा नागरिक उड्डयनको क्षेत्र प्रभावकारी हुनु पर्नेमा जोड दिए। उनले उड्डयन क्षेत्रमा विश्वास दिलाउन सकेको अवस्थामा मात्रै विदेशी पर्यटक भित्र्याउन सकिने गरि विश्वास दिलाउनु पर्ने बताए ।