बझाङ– बझाङमा जेसीबी दुर्घटना हुँदा चालकको मृत्यु भएको छ । जयपृथ्वी नगरपालिकाको सुपप्र ०१००१ क २३५४ नम्बरको जेसीबी जयपृथ्वी राजमार्ग अन्तर्गत सिमखेतमा सोमबार राति साढे ९ बजेतिर दुर्घटना परेको हो । 

जेसीबी दुर्घटना हुँदा चालक बित्थडचीर गाउँपालिका –६ का ३० वर्षीय प्रकाश कठायतको घटनास्थलमै मृत्यु भएको जिल्ला प्रहरी कार्यालय बझाङले जनाएको छ । 

बसपार्कबाट नगरपालिकाको कार्यालयतर्फ गइरहेको जेसीबी दुर्घटनामा परेको हो । जेसीबी सडकबाट २० मिटर तल खसेको बताइएको छ । जेसीबीमा च्यापिएर चालकको मृत्यु भएको हो । 

मृतकको शव पोस्टमार्टमका लागि जिल्ला अस्पताल बझाङमा राखिएको र घटनाका विषयमा थप अनुसन्धान भइरहेको जिल्ला प्रहरी कार्यालय बझाङका प्रवक्ता, प्रहरी निरीक्षक दिपेश चौधरीले बताए ।