काठमाडौं – तीव्र गतिमा आर्थिक विकास गरिरहेको भारतमा हाल प्रविधि क्षेत्रको विकास पनि तीव्र गतिमा भइरहेको छ । अहिले भारतले पाचौँ पुस्ताको ५जी टेलिकम प्रविधिको विकासमा काम गरिरहेको छ ।

हालै सार्वजनिक एक प्रतिवेदनमा सन् २०३० सम्ममा भारतमा ५जी प्रयोगकर्ताको सङ्ख्या ९७ करोड पुग्ने प्रतिवेदन सार्वजनिक भएको छ । एरिक्सन मोबिलिटी रिपोर्टका अनुसार सन् २०३० सम्म भारतका कुल मोबाइल प्रयोगकर्तामध्ये ७४ प्रतिशत प्रयोगकर्ताले ५जी प्रविधिको प्रयोग गर्नेछन् ।

प्रतिवेदनका अनुसार यस वर्षको अन्त्यसम्म भारतका २७ करोड प्रयोकर्ताले ५जी प्रयोग गर्ने अपेक्षा छ । हाल भारतका ५४ प्रतिशत अर्थात् ६४ करोड जनसङ्ख्याले ४जी प्रविधि प्रयोग गरिरहेका छन् । यो सङ्ख्या सन् २०३० सम्म २४ करोडमा झर्ने अपेक्षा गरिएको छ ।

भारतमा सन् २०२२ मा ५जी प्रविधिको शुरुवात गरिएको थियो । सन् २०२२ अक्टोबर १ का दिन प्रधानमन्त्री नरेन्द्र मोदीले भारतमा पहिलो पटक ५जी प्रविधिको शुभारम्भ गरेका थिए ।