काठमाडाैं – सम्पत्ति शुद्धीकरणका घटनामा हङ्कङमा रहेका वित्तीय संस्थाहरुको दुरुपयोग भइरहेको भन्दै अमेरिकी अधिकारीले चिन्ता व्यक्त गरेका छन् । अमेरिकाको तल्लो सदन हाउस अफ रिप्रेजेन्टेटिभअन्तर्गत चिनियाँ कम्युनिष्ट पार्टीको मामिलाबारे नीति निर्धारण गर्न गठित समितिका सदस्यले यस्तो चिन्ता व्यक्त गरेका हुन् ।

चिनियाँ कम्युनिष्ट पार्टी मामिलाका लागि गठित हाउस सेलेक्ट कमिटिका अध्यक्ष जोन मूलेनार र सदस्य राजा कृष्णमूर्तिले सम्पत्ति शुद्धीकरण गर्न, अन्तर्राष्ट्रिय प्रतिबन्धबाट जोगिन र अन्य अवैध वित्तीय गतिविधिका लागि हङ्कङका वित्तीय संस्थाहरुको दुरुपयोग भइरहेको जनाएका हुन् ।

अमेरिकी अर्थमन्त्री जानेट येलेनलाई पत्र लेख्दै उनीहरुको हङ्कङका वित्तीय संस्थालाई चीन, इरान, रुस, उत्तर कोरियाजस्ता मुलुकले दुरुपयोग गरिरहेको उल्लेख गरेका छन् ।

अमेरिकाले हङ्कङ नीति विधेयकअनुसार परम्परागत रुपमा हङ्कङलाई चीनभन्दा फरक व्यवहार गर्दै आएको छ । यसअनुसार अमेरिकाले हङ्कङसँग लागि विशिष्ट व्यापारिक सम्बन्ध स्थापित गरेको छ ।

यद्यपि चीनले हङ्कङमा सन् २०२० मा लागू गरेको राष्ट्रिय सुरक्षा कानुनले हङ्कङको स्वायत्ततामा हस्तक्षेप भएको भन्दै अमेरिकामा चिन्ता व्यक्त हुँदै आएको छ । यससँगै अमेरिकाले हङ्कङबारे हालसम्म लिँदै आएका नीतिमा परिवर्तन हुनुपर्ने आवाज समेत उठ्दै आएको छ ।