काठमाडौं- सत्तारुढ दलकै सांसदहरूले प्राकृतिक विपत्को पूर्वतयारी र उद्धारका काम समयमा हुन नसक्दा ठूलो जनधनको क्षति भएको बताएका छन् ।

मंगलबार सिंहदरबारमा बसेको प्रतिनिधिसभाअन्तर्गतको राज्य व्यवस्था समिति बैठकमा उनीहरूले मौसम पूर्वानुमान अनुसार ठूलो पर्षा हुन सक्ने आँकलन हुँदा पनि सरकारले लापरबाही गरेको बताए ।

सरकारले पूर्वसूचनाअनुसारको पूर्वतयारी र उद्धारका काम समयमा हुन नसक्दा ठूलो जनधनको क्षति भएको बताएका हुन् ।

बैठकमा बोल्दै कांग्रेस महामन्त्री एवम् सांसद गगनकुमार थापाले पूर्वतयारी र उद्धारमा भएका आलोचनालाई सरकारले स्वीकार गर्नुपर्ने बताए ।

उनले अब उद्धार र राहतका कामलाई थप प्रभावकारी बनाउन सरकारलाई सुझाव दिएका छन् । विपद्का बेला सरोकारवाला निकायका प्रमुखहरूले प्रभावकारी भूमिका खेल्न नसकेको उनले बताए ।

थापाले रात्रिबस सञ्चालन नगर्ने निर्णय हुँदाहुँदै पनि सञ्चालन गरेकाले धादिङको झ्याप्लेखोलामा ठूलो विपद् भएको भन्दै यसको छानबिन हुनुपर्ने माग गरे ।

त्यस्तै राष्ट्रिय स्वतन्त्र पार्टीका सभापति रवि लामिछानले विपद्को पूर्वतयारी राम्रोसँग हुन नसकेको बताए । उनले विपद्पछि राजमार्गमा अलपत्र नागरिकको सहज ढंगले उद्धा हुन नसकेको आरोप लगाए ।

त्यस्तै राष्ट्रिय जनमोर्चाका सांसद चित्रबहादुर केसीले काठमाडौंमै उद्धामा निकै ढिलाई भएको बताए । त्यहीकारण क्षति धेरै भएको उनले बताए।

बाटो अवरुद्ध भएका बेला हवाई भाडा निकै महङ्गो भएकाले यसलाई नियन्त्रण गर्न उनले सरकारको ध्यानाकर्षण गराएका छन् ।