काठमाडौं- जनता समाजवादी पार्टी नेपालका अध्यक्ष उपेन्द्र यादव दक्षिण अमेरिकाको चिली जाने भएका छन् ।

यादव बुधबार कतार एयरलाइन्सको विमानबाट चिलीतर्फ जान लागेका हुन् ।

चिलीको स्यान्टियागोमा सबै महादेशका विभिन्न मुलुकहरूका प्रगतिशील, सामाजिक लोकतान्त्रिक, श्रमिक र समाजवादी पार्टीको अन्तर्राष्ट्रिय संगठन प्रोग्रेसिभ एलाइन्सको आयोजनामा हुन लागेको विश्व सम्मेलनमा सहभागी हुन अध्यक्ष यादव जान लागेका हुन् ।

अक्टोबर ५ र ६ तारिखमा आयोजना हुने ‘थर्ड ग्लोबल कन्भेन्सन अफ दि प्रोग्रेसिभ एलाइन्स’को उक्त सम्मेलनमा अध्यक्ष यादवको नेतृत्वमा जसपा नेपालको अन्तर्राष्ट्रिय विभाग प्रमुख अर्जुन थापासहितको प्रतिनिधिमण्डल चिली जाँदैछ ।

अध्यक्ष यादवसहितको प्रतिनिधिमण्डल असोज २४ गते राति कतार एयरलाइन्सबाट स्वदेश फर्किने कार्यक्रम छ ।