महेन्द्रनगर– चाडपर्व नजिकिएसँगै हुने दुर्घटना न्यूनीकरणका लागि ट्राफिक प्रहरीले सवारी चेकजाँचलाई बाक्लो बनाउन थालेको छ ।

दशैंतिहारको समयमा सवारी चेकजाँचमा कडाइ गर्दा ट्राफिक प्रहरीले प्रायः पर्व खर्च उठाउन ‘चेकिङ’ मा बस्छन् भन्ने आरोप लाग्ने गरेको छ । मंगलबार बिहानै महाकाली पारीको नगरपालिका दोधारा–चाँदनीमा पनि प्रहरी सवारी चेकजाँचमा खटिएका थियो ।

स्थानीय नागरिक बिनाहेल्मेट दुई पाङ्ग्रे सवारी साधनमा ओहोर–दोहोर गरिरहेका थिए । अरुबेला ट्राफिक नियम उल्लंघन गर्ने सवारी चालकलाई जरिवाना गराउँदै ‘चिट’ काट्ने ट्राफिक प्रहरी मंगलबार भने ट्राफिक नियमबारे सचेत गराइरहेका थिए ।

इलाका प्रहरी कार्यालय दोधारा–चाँदनीका प्रहरी निरीक्षक जगत गाहामगरको नेतृत्वमा खटिएका प्रहरीसँगै देखिन्थे– वडा नम्बर ६ का अध्यक्ष ओम बस्नेत । उनी नयाँ हेल्मेटहरूका साथ प्रहरीसँगै बाटोमा उभिएका थिए ।

स्थानीय जनप्रतिनिधि साथमा राखेर सवारी चेकजाँच गर्ने क्रममा एक युवा बिनाहेल्मेट मोटरसाइकलमा आउँछन् । उनलाई प्रहरीले रोक्छ, सम्झाई बुझाई गर्छ । वडाध्यक्ष बस्नेत ती युवालाई रातो रंगको हेल्मेट दिन्छन् ।

‘चेतावनीस्वरुप हामी तपाईंलाई यो हेल्मेट दिन्छौँ । आगामी दिनमा यसरी हेल्मेट नलागाई सवारी साधन चलाउनु हुँदैन भन्ने बुझ्नु पर्यो‍ । छर–छिमेकीलाई पनि जानकारी गराउनु प¥यो,’ उनी युवालाई सम्झाउँदै भन्छन्, ‘सडक दुर्घटनाले मृत्यु हुने सम्भावना पनि हुन्छ । यो हेल्मेट ट्राफिक प्रहरी वा जनप्रतिनिधिका लागि होइन । यो सवारी चलाउनेको सुरक्षाका लागि हो ।’

वडाध्यक्ष बस्नेतले आफ्नो वडा क्षेत्रमा पर्ने सडकमा दुर्घटना न्यूनीकरणका लागि नेपाल प्रहरीसँग समन्वय गरेर ट्राफिक सचेतना कार्यक्रमका लागि बिहानैबाट सडकमा उभिएको प्रतिक्रिया दिए ।

उनले मंगलबार एकदिने ट्राफिक सचेतनामूलक कार्यक्रम गरिएको बताए । ट्राफिक नियम उल्लंघन गरेर दुई पाङ्ग्रे सवारी साधन चलाउने १० जनालाई हेल्मेट उपहार दिइएको जानकारी बस्नेतले दिए ।

वडाध्यक्ष बस्नेत गत स्थानीय तह निर्वाचनमा नेकपा एमालेकातर्फबाट निर्वाचित भएका थिए । ८७४ मतसहित वडा नम्बर ६ को वडाध्यक्षमा बस्नेत विजयी हुँदा उनका निकटतम् प्रतिद्वन्द्वी नेपाली कांग्रेसका उम्मेदवार दिलबहादुर सिजालीले ७५१ मत पाएका थिए ।