काठमाडौं – भीषण बाढीका कारण ललितपुरको च्यासलस्थित केन्द्रीय कार्यालय डुबानमा परेपछि प्रमुख सत्तारूढ नेकपा एमालेको सचिवालय बैठक हनुमानथानस्थि होटल बसेरामा बसेको छ ।

यही शुक्रबार र शनिबारको अविरल वर्षाका कारण एमाले पार्टी कार्यालय यो वर्ष दोस्रो पटक डुबानमा परेको छ ।

केही बेरअघि सुरु भएको यो बैठकमा राष्ट्रसंघको ७९ औँ महासभामा भाग लिएर ११ दिनपछि नेपाल फर्किएका प्रधानमन्त्री एवम् पार्टी अध्यक्ष केपी शर्मा ओली पनि सहभागी छन् ।

• च्यासलको कार्यालयमा बाढी पसेपछि होटल बसेरामा एमालेको बैठक 
• पार्टी बैठक सरकारी निवासमा राख्दिनँ : प्रधानमन्त्री ओली 

बाढीको विपत्मा परेर सयौँ नागरिकको मृत्यु भएको छ । हजारौँले घरबार गुमाएका छन् । यस्तोमा सरकारको कामलाई लिएर जनस्तरमा चर्को आलोचना भइरहेको छ ।

ओली स्वदेश फर्किएलगत्तै एमालेको सचिवालय बैठक बसेको हो । बैठकमा देशभर बाढीपहिरोले गरेको क्षति, उद्धार र राहतसहितका विषयमा छलफल हुने बताइएको छ ।

यसअघि गत साउन १६ गते पनि एमाले कार्यालयमा बाढी पसेको थियो । त्यसपछि साउन १७ गते एमाले सचिवालय बैठक हनुमानथानस्थित बसेरा होटलमा बसेको थियो ।