लेबनान – इजरायलको आक्रमणपछि लेबनानमा १० लाख विस्थापित भएका छन्। आक्रमणमा परेर एक हजार भन्दा बढीको ज्यान गएको अनुमान गरिएको छ।

सोमबारदेखि इजरायलले दक्षिणी लेबनानमा जमिन आक्रमण सुरु गरेको छ। लेबनानका गाउँहरूमा धुवाको मुस्लो प्रस्ट देख्न सकिन्छ। इजरायलको आक्रमण लगत्तै त्यहाँ असामान्य जनजीवन सुरु भइसकेको छ।

सोमबार नै इजरायलको क्याबिनेट बैठकले जमिन आक्रमण सुरु गर्ने निर्णय गरे लगत्तै दक्षिणी लेबनानलाई निशाना बनाइएको हो।

जमिन आक्रमण सुरु गर्नु अगाडि भएको हवाई आक्रमणमा ९५ जनाको ज्यान गइसकेको थियो। बेरुतको डाहिएमा यसरी भीषण आक्रमण गर्नुअघि इजरायलले धेरै पटक त्यहाँका स्थानीयलाई घर छाड्न भनिसकेको थियो।

इजरायली सेनाले हिजबुल्लाहको संरचना नाश गर्नका लागि यो आक्रमण गरेको जनाएको छ। बेरुतको मूल सहरमा भने ७ अक्टोबरपछि पहिलो पटक हवाई आक्रमणमा केही कमी आएको छ।

एकपछि अर्को सिनियर नेताहरूको ज्यान गए पनि हिजबुल्लाहले प्यालेस्टाइनको समर्थनमा इजरायलसँगको लडाइँ जारी राख्ने जनाएको छ। साथै सो सैन्य समूहले हसन नसरल्लाहको उत्तराधिकारी तत्काल चयन गर्ने पनि जनाएको छ।

बेलायतले भने लेबनानमा रहेका आफ्ना नागरिकलाई विमान चार्टर गरेर देशमा ल्याउने भएको छ। इजरायलले जमिनमा समेत युद्ध गर्ने जनाएपछि बेलायतले यो घोषणा गरेको हो। इजरायलले पनि लेबनानको सीमामा रहेका आफ्ना नागरिकलाई घरबाट बाहिर ननिस्कन भनेको छ।