काठमाडौं- काठमाडौं महानगरपालिका प्रमुख बालेन्द्र शाह एक पटक फेरि नेकपा एमालेको नेतृत्वमाथि खनिएका छन् ।

एमालेबाट लुम्बिनी प्रदेश सभामा निर्वाचित सांसद रेखा शर्माले एकजना बालिकालाई घरेलु श्रमिकका रुपमा राखेर शोषण गरेको घटनामा उनले सार्वजनिक रुपमा गम्भीर आरोप लगाएका हुन् ।

सांसद शर्मालाई पक्राउ गर्नुपर्ने मागसहित उनले एमाले अध्यक्षसमेत रहेका प्रधानमन्त्री केपी शर्मा ओलीलाई आइतबार सामाजिक सञ्जालमार्फत दबाब दिएका हुन् ।

मेयर साहले ८ वर्षदेखि बालिकालाई बन्दी बनाएर घरेलु श्रमिकका रुपमा बाल श्रमशोषण गरेको घटनाका संलग्न सांसद शर्मालाई पक्राउ नगरेको भन्दै आपत्ति जनाएका हुन् ।

सांसद शर्मालाई उक्त प्रकरणमा अदालतले मुद्दा चलाउनू भन्दा पनि वर्तमान सरकारले जोगाएर राखेको जिकिर साहले गरेका हुन् । काठमाडौं महानगरपालिकाले २ महिनादेखि कारबाही अघि बढाउनु भन्दा पनि यो सरकारले नसमातेको दाबी उनको छ ।

साहले प्रधानमन्त्री ओलीलाई पनि सुशासन भनेको यही हो भनेर प्रश्न गरेका छन् । उनले सुशासनको अर्थ बालिकाको मृत्युपछि गोहीको आँसु चुहाएर फेसबुकमा समवेदना दिँदै एक लाख राहत घोषणा गर्नु नै होला भनेर ओलीलाई प्रहार गरेका छन् ।

‘उहाँ हुनुहुन्छ नेकपा एमालेकी प्रदेश सांसद रेखा शर्मा । उहाँले विगत ८ वर्षदेखि बन्दी बनाएर, एकजना नाबालिकालाई घरेलु कामदारका नाममा हिंसा गर्दै आउनु भएको छ, दैनिक कुटपिट गर्दै आउनु भएको छ’, उनले भनेका छन्, ‘काठमाडौं महानगरले विगत २ महिनादेखि कारबाही अगाडि बढाउनुभन्दा पनि यो सरकारले समातेको छैन । अदालतले पनि मुद्दा चलाउनु भनिसकेको छ ।’

उनले यस प्रसंगमा ओलीको सुशासनबारे पनि प्रश्न उठाएका छन् । ‘सम्माननीय प्रधानमन्त्री खड्गप्रसाद ओलीज्यू,सुशासन भनेको अदालतले पनि समात भनेको तपाईंको सांसद रेखा शर्मा जसलाई बाल शोषण गरेको मुद्दा छ समात्नुलाई भन्छ’, उनले ओलीमाथि प्रहार गर्दै भनेका छन्, ‘सायद तपाईंको लागि सुशासनको अर्थ बालिकाको मृत्युपछि गोहीको आँसु चुहाएर फेसबुकमा समवेदना दिँदै एक लाख घोषणा गर्नु नै होला । कहिले समात्ने ? कि नसमात्ने ?’